🛑Tout sa w dwe konnen sou lalwa🛑

           Tout sa w dwe konnen sou lalwa

Depi kèk tan nou wè anpil moun ap pale de lalwa kòm yon plant ki bon anpil e ki geri anpil maladi. Eske se vre ? Wi se vre. Men konsa tou si w pa konnen ki prekosyon pou pran lè w ap fè remèd ak lalwa oubyen konsome l li kapab voye w nan peyi san chapo.

Lalwa gen non syantifik li ki se ALOE VERA, ALOE BARBADENSIS oubyen ALOE FEROX. Se yon plant ki gen 3 pati : youn se pati ekstèn fèy la, li gen yon lòt pati ki se LATEX la ki li menm se yon likid jòn ki nan ekòs la epi Trazyèm pati a se GÈL la ki nan mitan an,  yo rele l nan lang fransè a PULPE ( Gade premye imaj la byen kote y ap montre w 3 pati yo).

Nan 3 pati nou sot site yo se sèlman GÈL la ki '''comestible'’ sa ki vle di ou kapab manje l epi fè remèd avèl san problèm. Men si toutfwa sa rive ou konstipe bridsoukou ou kapab pran/ konsome 50 a 200 gram nan LATEX la leswa pandan ou pral dòmi pandan 2 oubyen 3 swa sèlman. Epi w ap jwenn solisyon. Men remèd sa pa pou moun ki konstipe souvan. Depi w konstipe souvan al lakay medsen pou yo ba w lòt '’’’ laxative'’’’’

Poukisa yon moun pa pakab konsome LATEX la anpil.  Enben se paske LATEX la gen yon molekil ladan l yo rele '’’ALOÏNE’’’ ki kapab gen gwo konsekans sou sante w paske li kapab ba ou : Gwo kranp ak doulè lestomak, kansè nan gwo entesten, problèm nan fwa ak ren, ilsè, apendisit, kriz kadyak epi VOMISMAN.

Men apresa nou kapab utilize GÈL lalwa san problèm kit se pou maladi nou gen sou po kò nou ak anndan nou. Men yon ansanm maladi GÈL lalwa bon pou li :

‘’’ herpès génital'’’, enfeksyon, enflamasyon, dyabèt, gal, gratèl, egzema, genjivit. Si w gen maling oubyen ou boule depi pase lalwa sou li l ap akselere gerizon w. Pou boule a fòk se yon boule ki nan 1e ak 2e degré sèlman.

Pa bliye lalwa se yon bon plant ki bon pou anpil maladi epi li gen anpil proteyin ak vitamin tankou A,C, E, B1, B2, B6, B9, B12. Epi li gen kalsyòm, kwòm, fosfò, kwiv, fè, selenyòm, manyezyòm, manganèz, potasyòm, sodyòm epi zen. Men pa janm bliye sa : depi se pa konstipe ou konstipe pa janm pran LATEX la ki kapab gen gwo konsekans sou sante w. SE TOUJOU GÈL LA POU NOU PRAN.

Junior Dorval